ہجر برباد کر گیا ہے مجھے

ہجر برباد کر گیا ہے مجھے

اب کہیں جا کے تو ملا ہے مجھے

ایک اندھے نے منزلوں سے کہا

کوئی رستے سے دیکھتا ہے مجھے

درد کا چہرہ دیکھ سکتا ہوں

یہ مرا زخم آئنہ ہے مجھے

آتے جاتے مجھے ہی دیکھتے ہیں

کیسے لوگوں سے واسطہ ہے مجھے

میں ہمیشہ ہی بھول جاتا ہوں

یاد اس نے سدا رکھا ہے مجھے

میں بھی واقف ہوں شہر والوں سے

شہر بھی خوب جانتا ہے مجھے

اک گلی مجھ میں دشت جیسی ہے

یہ مری آنکھ آبلہ ہے مجھے

منزلیں بچھ گئیں مرے آگے

وقت حسرت سے دیکھتا ہے مجھے

بات اتنا اثر نہیں کرتی

بات کا لہجہ کاٹتا ہے مجھے

راہ تاریک کو پتہ ہے خضرؔ

کچھ چراغوں کا آسرا ہے مجھے