hijr mein gham-kash koi mujh sa nahin

hijr meñ ġham-kash koī mujh sā nahīñ

aaj tak maiñ ne use dekhā nahīñ

kahne vaale ne to sab kuchh kah diyā

sunñe vaalā ek bhī samjhā nahīñ

maah maiñ kis ko sunā.ūñ hāl-e-zār

ḳhvāb meñ bhī vo nazar aayā nahīñ

jab nazar ho manzil-e-maqsūd par

rok saktī raah kī iizā nahīñ

aarzū hī us kī dil meñ rah ga.ī

haath dāman tak kabhī pahuñchā nahīñ

bazm-e-sāqī meñ hue vo sarfarāz

jaam jin ke haath meñ chhalkā nahīñ

vā'da-e-fardā kī phir tafsīl kar

kyā kahā tū ne koī samjhā nahīñ

hai ġhazab phir suur ne chauñkā diyā

niiñd bhar kar maiñ abhī soyā nahīñ

apnā sā muñh le ke shāna rah gayā

pech gesū kā koī suljhā nahīñ

kasb har dam kuchh na kuchh kartī hai ruuh

jaisā kal thā aaj maiñ vaisā nahīñ

jo nahīñ mast-e-sharāb-e-be-ḳhudī

us ne lutf-e-zindagī paayā nahīñ

jiite jī apne ko kar detā thā ḳhaak

maut se marnā koī marnā nahīñ

yaad ai 'betāb' rakhnā yaar ko

paar hai beḌā agar bhūlā nahīñ

hijr mein gham-kash koi mujh sa nahin

aaj tak main ne use dekha nahin

kahne wale ne to sab kuchh kah diya

sunne wala ek bhi samjha nahin

mah main kis ko sunaun haal-e-zar

KHwab mein bhi wo nazar aaya nahin

jab nazar ho manzil-e-maqsud par

rok sakti rah ki iza nahin

aarzu hi us ki dil mein rah gai

hath daman tak kabhi pahuncha nahin

bazm-e-saqi mein hue wo sarfaraaz

jam jin ke hath mein chhalka nahin

wa'da-e-farda ki phir tafsil kar

kya kaha tu ne koi samjha nahin

hai ghazab phir sur ne chaunka diya

nind bhar kar main abhi soya nahin

apna sa munh le ke shana rah gaya

pech gesu ka koi suljha nahin

kasb har dam kuchh na kuchh karti hai ruh

jaisa kal tha aaj main waisa nahin

jo nahin mast-e-sharab-e-be-KHudi

us ne lutf-e-zindagi paya nahin

jite ji apne ko kar deta tha KHak

maut se marna koi marna nahin

yaad ai 'betab' rakhna yar ko

par hai beDa agar bhula nahin