ہجرت کی بات آئے بھی کیسے گمان میں

ہجرت کی بات آئے بھی کیسے گمان میں

اجداد میرے دفن ہیں ہندوستان میں

سچائیاں تھیں جتنی کفن پوش ہو گئیں

منصف نے رنگ وہ بھرا جھوٹے بیان میں

اس سے بھی میرے ظرف کا تو امتحان لے

باقی جو ایک تیر ہے تیری کمان میں

پھر سے تمہاری یاد کے جگنو چمک اٹھے

پھر سے اجالا ہو گیا دل کے مکان میں

خود دار سر تھا جسم سے جو ہو گیا جدا

لیکن جھکا نہ ظل الٰہی کی شان میں

بخشا ہے جو خلوص سے احباب نے مجھے

ایسا کہاں ہے درد کسی داستان میں

پھولوں کے بدلے خار ملیں گے بہار سے

تابشؔ یہ بات کب تھی ہمارے گمان میں