اک عجب خوف سا تجدید سے آتا ہے مجھے

اک عجب خوف سا تجدید سے آتا ہے مجھے

کیوں مٹانے کے لئے پھر سے بناتا ہے مجھے

اس کو روتے ہوئے لوگوں پہ ہنسی آتی ہے

سو وہ ہنسنے کے لئے خوب رلاتا ہے مجھے

میں کہیں ہوں ہی نہیں اپنے مطابق لیکن

اس کا کہنا ہے کہ ہر سمت وہ پاتا ہے مجھے

کتنی مشکل سے میں ہر بار چھڑاتا ہوں جان

کون آئینے کے پھر سامنے لاتا ہے مجھے

کتنا اچھا ہے مرا یار محبت ہی نہیں

بے وفائی کے بھی آداب سکھاتا ہے مجھے

رات کٹتی ہے مری جس کی بلائیں لیتے

صبح وہ شخص نظر کیوں نہیں آتا ہے مجھے

کھینچ لیتا ہوں قدم اپنے میں پیچھے ترکشؔ

دل تو رہ رہ کے تری اور بڑھاتا ہے مجھے