ارادوں کا بدن کوئی بھی پایندہ نہیں رکھتا

ارادوں کا بدن کوئی بھی پایندہ نہیں رکھتا

مرا اسم مکبر ہی مجھے زندہ نہیں رکھتا

اب اس کی حاکمیت چند پہروں تک سمٹ آئی

وہ ایسے حال میں بھی فکر آئندہ نہیں رکھتا

چلا آتا ہوں میں الزام سے پہلے کٹہرے میں

عدالت میں انا کی خود کو شرمندہ نہیں رکھتا

سبھی لہجوں نے درس عافیت تو یاد رکھا ہے

مساوی سوچ لیکن کوئی باشندہ نہیں رکھتا

میں ایسے سرپھرے لوگوں میں بستا ہوں جہاں اخترؔ

قبیلہ ختم ہو جائے نمائندہ نہیں رکھتا