isko qudrat ki did karta hun

is kī qudrat kī diid kartā huuñ

roz nau-roz iid kartā huuñ

merā ahvāl-e-faqr mat pūchho

zohd misl-e-farīd kartā huuñ

roz bāzār-e-mulk-e-hastī meñ

jins-e-isyāñ ḳharīd kartā huuñ

fat.h karne ko qalb-e-dil kā hisār

teġh-e-himmat kalīd kartā huuñ

bas-ki maiñ tishna-e-shahādat huuñ

dil ko har-dam shahīd kartā huuñ

na maiñ sunnī na shii.a ne kāfir

suufī huuñ sab kā viid kartā huuñ

shaiḳh tū go ki pīr-zāda hai

rah tujhe maiñ murīd kartā huuñ

apne ehsān-e-ḳhalq se 'hātim'

aadmī ko abiid kartā huuñ

is ki qudrat ki did karta hun

roz nau-roz id karta hun

mera ahwal-e-faqr mat puchho

zohd misl-e-farid karta hun

roz bazar-e-mulk-e-hasti mein

jins-e-isyan KHarid karta hun

fath karne ko qalb-e-dil ka hisar

tegh-e-himmat kalid karta hun

bas-ki main tishna-e-shahadat hun

dil ko har-dam shahid karta hun

na main sunni na shia ne kafir

sufi hun sab ka wid karta hun

shaiKH tu go ki pir-zada hai

rah tujhe main murid karta hun

apne ehsan-e-KHalq se 'hatim'

aadmi ko abid karta hun