اس طرح آپ نے ندرت سے نکھارے الفاظ

اس طرح آپ نے ندرت سے نکھارے الفاظ

آپ ہی جھوم اٹھے فخر کے مارے الفاظ

حرف روشن سے سر بزم اجالا ہوگا

شعلۂ نطق سے پھوٹیں جو شرارے الفاظ

کس طرح حسن کو تیرے یہ بیاں کر پاتے

چاند چہرہ ہے ترا اور ستارے الفاظ

ایک دن بن کے بہیں گے یہ تمہارے آنسو

ایک دن یاد کرو گے یہ ہمارے الفاظ

اب تو اس ساتھ کو لفظوں کی ضرورت ہی نہیں

بن گئے ہیں تری آنکھوں کے اشارے الفاظ

اس کی توصیف کے الفاظ نہیں مل سکتے

جس نے انسان کے سینے پہ اتارے الفاظ

کاٹ سہنا بھی بڑی بات ہوا کرتی ہے

یہ مری شاخ ہنر اور یہ آرے الفاظ

میں تصاویر بنانے میں مگن تھا سیدؔ

کہ اچانک مرے اندر سے پکارے الفاظ