is tarah karti hai ghar ko KHatm chashmak dekh le

is tarah kartī hai ghar ko ḳhatm chashmak dekh le

jaise ik zaatī kutub-ḳhāne ko dīmak dekh le

bāñTnā dukh-sukh bhī ham-sāyoñ ke lekin ai 'azīz

aañkh par hirs-o-havas kī pahle 'ainak dekh le

ek hī sā'at meñ raushan ho ga.e dīvār-o-dar

de rahā hai kaun darvāze pe dastak dekh le

kis tarah ahbāb meñ rahtā nahīñ fikr-e-ziyāñ

vaqt ko kartī hai kaise qatl baiThak dekh le

laḌ rahe haiñ āj-kal dānishvarān-e-qaum bhī

chashm-e-bīnā ho na ho raushan hai maslak dekh le

saare ahbāb apne apne rāstoñ par ho liye

ai 'azīm' apnī taraf ab tū bhī be-shak dekh le

is tarah karti hai ghar ko KHatm chashmak dekh le

jaise ek zati kutub-KHane ko dimak dekh le

banTna dukh-sukh bhi ham-sayon ke lekin ai 'aziz

aankh par hirs-o-hawas ki pahle 'ainak dekh le

ek hi sa'at mein raushan ho gae diwar-o-dar

de raha hai kaun darwaze pe dastak dekh le

kis tarah ahbab mein rahta nahin fikr-e-ziyan

waqt ko karti hai kaise qatl baiThak dekh le

laD rahe hain aaj-kal danishwaran-e-qaum bhi

chashm-e-bina ho na ho raushan hai maslak dekh le

sare ahbab apne apne raston par ho liye

ai 'azim' apni taraf ab tu bhi be-shak dekh le