اس طرح کرتی ہے گھر کو ختم چشمک دیکھ لے

اس طرح کرتی ہے گھر کو ختم چشمک دیکھ لے

جیسے اک ذاتی کتب خانے کو دیمک دیکھ لے

بانٹنا دکھ سکھ بھی ہم سایوں کے لیکن اے عزیز

آنکھ پر حرص و ہوس کی پہلے عینک دیکھ لے

ایک ہی ساعت میں روشن ہو گئے دیوار و در

دے رہا ہے کون دروازے پہ دستک دیکھ لے

کس طرح احباب میں رہتا نہیں فکر زیاں

وقت کو کرتی ہے کیسے قتل بیٹھک دیکھ لے

لڑ رہے ہیں آج کل دانشوران قوم بھی

چشم بینا ہو نہ ہو روشن ہے مسلک دیکھ لے

سارے احباب اپنے اپنے راستوں پر ہو لیے

اے عظیمؔ اپنی طرف اب تو بھی بے شک دیکھ لے