عشق کا دیپ ہر اک دل میں جلاؤ جاناں

عشق کا دیپ ہر اک دل میں جلاؤ جاناں

حسن اور عشق کی تفسیر بتاؤ جاناں

تم کو دیوانگی کیا ہے یہ سمجھنا ہو اگر

تم بھی مجذوب کی دہلیز پہ جاؤ جاناں

حسن کو ان کے فقط حسن سمجھتے ہو تم

پہلے دنیا میں کوئی مثل تو لاؤ جاناں

مجھ سے ملنے کی تمنا ہے تو آ کر مل لو

ناز نخرے نہ مجھے ایسے دکھاؤ جاناں

بس شرف دید کا اک بار عنایت کر دو

اس قدر اب نہ مرے دل کو ستاؤ جاناں

گر تمہیں زیست میں تکلیف نہیں چاہیے تو

تم کسی سے بھی یہاں دل نہ لگاؤ جاناں

آ گئے ہیں اگر اشرفؔ تو یہ کہہ دو ان سے

پھر کوئی تازہ غزل لکھ کے سناؤ جاناں