عشرت گہ جہاں میں تماشہ ہے چار سو

عشرت گہ جہاں میں تماشہ ہے چار سو

یعنی فریب دشت تمنا ہے چار سو

نقش و نگار وحشت دلگیر کے سوا

دامان گل فروش میں اور کیا ہے چار سو

سیر و طواف گوہر رنج و الم کرو

حد نظر میں عشق کی دنیا ہے چار سو

سن کر بیان باد صبا ہو گیا یقین

تیری زبان شیریں کا چرچا ہے چار سو

اک بحر تیرگی کے سوا کیا تھی کائنات

اب تو تری اداؤں کا جلوہ ہے چار سو

اوراق آسماں کے بھی دیکھے ہیں کھول کر

ہم دونوں ہی کے عشق کا قصہ ہے چار سو

اک دن کھلے گا بن کے گل انقلاب عشق

میرا لہو زمین پہ بکھرا ہے چار سو

سورج بھی جس کی تاب سے تھرا کے ہٹ گیا

وہ برق زیر ہستیٔ اشیا ہے چار سو

ہے مرکز نشاط دو عالم ندیمؔ جی

بچوں نے میرے نقشہ وہ کھینچا ہے چار سو