اسی لیے تو یہ شامیں اجڑنے لگتی ہیں

اسی لیے تو یہ شامیں اجڑنے لگتی ہیں

کہ لو بڑھا کے ہوائیں سکڑنے لگتی ہیں

میں کیسے اپنے توازن کو برقرار رکھوں

قدم جماؤں تو سانسیں اکھڑنے لگتی ہیں

یوں ہی نہیں مجھے دریا کو دیکھنے سے گریز

سنا ہے پانی میں شکلیں بگڑنے لگتی ہیں

اسی لیے تو ہوا اپنے گھر نہیں جاتی

کہ اس کے بعد یہ گلیاں اجڑنے لگتی ہیں

رہیں خموش تو ہونٹوں سے خوں ٹپکتا ہے

کریں کلام تو کھالیں ادھڑنے لگتی ہیں

اگر میں سانس بھی آہستہ سے نہ لوں تابشؔ

مرے بدن میں دراڑیں سی پڑنے لگتی ہیں