اتوار صبح چار سوا چار کون ہے

اتوار صبح چار سوا چار کون ہے

گھنٹی تو چھوڑ آیا ارے یار کون ہے

صحرا کی سرد رات عقب سے خفیف چاپ

اس وقت اس جگہ پہ خبردار کون ہے

وہ مجھ سے قبل کیا تھا اور اب کیا ہے جا کے دیکھ

تعمیر خود بتائے گی معمار کون ہے

اس کو مرے مرض پہ خوشی ہے دلی خوشی

اب تو بتا کہ اصل میں بیمار کون ہے

اس کا گھمنڈ توڑ کے دیکھا اور آ گیا

بس دیکھنا ہی تھا پس دیوار کون ہے

معلوم تھا کسی نے بھی آنا نہیں مگر

چوکھٹ تک آ کے پوچھا کئی بار کون ہے