jaane kyon in dinon muztarib hai tabiat magar Thik hai

jaane kyoñ in dinoñ muztarib hai tabī'at magar Thiik hai

ik 'ajab sī ghuTan aur dil meñ hai vahshat magar Thiik hai

jāñ-balab thā koī shiddat-e-tishnagī se bhare shahr meñ

sab tamāshā.ī ban ke the vaañ mahv-e-hairat magar Thiik hai

aaj bhī zehn par terī yādoñ kā pahra hai shām-o-sahar

is qadar Dhā rahī hai sitam terī furqat magar Thiik hai

ḳhud ko kahte ho qaa.id magar ye batāo ki insāñ bhī ho

zālimo laash par kar rahe ho siyāsat magar Thiik hai

saañs roke hue dil ko thāme hue maiñ tirī bazm meñ

muntazir huuñ ki ho mujh pe nazr-e-'ināyat magar Thiik hai

chārāgar saarī duniyā se hāsil mohabbat kā maiñ kyā karūñ

mujh ko hai bas tire hausle kī zarūrat magar Thiik hai

aao ab is jahāñ ke banā.e hue sab qavānīn ko toḌ kar

kyoñ na kar deñ haqīqat meñ ik din baġhāvat magar Thiik hai

vo masīhā jo bātoñ se bhartā thā har zaḳhm ruḳhsat huā

ab kahāñ jaa.eñ kis se kaheñ dil kī hasrat magar Thiik hai

zulm-o-nafrat jihālat 'adāvat kā hai bol-bālā yahāñ

is ḳharābe meñ karte ho jiine kī chāhat magar Thiik hai

jaane kyon in dinon muztarib hai tabi'at magar Thik hai

ek 'ajab si ghuTan aur dil mein hai wahshat magar Thik hai

jaan-balab tha koi shiddat-e-tishnagi se bhare shahr mein

sab tamashai ban ke the wan mahw-e-hairat magar Thik hai

aaj bhi zehn par teri yaadon ka pahra hai sham-o-sahar

is qadar Dha rahi hai sitam teri furqat magar Thik hai

KHud ko kahte ho qaid magar ye batao ki insan bhi ho

zalimo lash par kar rahe ho siyasat magar Thik hai

sans roke hue dil ko thame hue main teri bazm mein

muntazir hun ki ho mujh pe nazr-e-'inayat magar Thik hai

chaaragar sari duniya se hasil mohabbat ka main kya karun

mujh ko hai bas tere hausle ki zarurat magar Thik hai

aao ab is jahan ke banae hue sab qawanin ko toD kar

kyon na kar den haqiqat mein ek din baghawat magar Thik hai

wo masiha jo baaton se bharta tha har zaKHm ruKHsat hua

ab kahan jaen kis se kahen dil ki hasrat magar Thik hai

zulm-o-nafrat jihaalat 'adawat ka hai bol-baala yahan

is KHarabe mein karte ho jine ki chahat magar Thik hai