جب ملے ہے پوچھتا تم کون ہو تم کون ہو

جب ملے ہے پوچھتا تم کون ہو تم کون ہو

آہ یہ کیسی ادا تم کون ہو تم کون ہو

دور مشکل میں گلہ اغیار کا کیسے کروں

جب کہے یہ آشنا تم کون ہو تم کون ہو

مالک کرسی تھا تو کرتے تھے جو جھک کر سلام

وہ کہیں جب سے گرا تم کون ہو تم کون ہو

جب کہا چاہت عدو سے اصل میں توہین عشق

بے وفا کہنے لگا تم کون ہو تم کون ہو

چاہے جب پھسلائے مجھ کو چاہوں میں کچھ بھی اگر

تو کہے یہ مہ لقا تم کون ہو تم کون ہو

دل ہے اصل زندگی دینے سے پہلے غیر کو

پوچھنے میں کیا برا تم کون ہو تم کون ہو

بندۂ ناچیز ایسا یوم محشر کو اگر

کیا عجب پوچھے خدا تم کون ہو تم کون ہو

جب کہا جپتے ہیں مالا ہم تو تیرے نام کی

ہنس کے اس نے کہہ دیا تم کون ہو تم کون ہو

دل میں تصویر صنم ہونٹوں پہ ہے نام خدا

میں سنوں ہر دم صدا تم کون ہو تم کون ہو

وعدۂ بوسہ کیا لیکن عوض میں دی چپت

اور نخوت سے کہا تم کون ہو تم کون ہو

عاشقی مسلک وہ انورؔ جس میں دو بنتے ہیں ایک

یہ گنہ ہے پوچھنا تم کون ہو تم کون ہو