جب وہ اپنوں کو محبت کی سزا دیتے ہیں

جب وہ اپنوں کو محبت کی سزا دیتے ہیں

مسکراتی ہوئی آنکھوں کو رلا دیتے ہیں

اے پرستار وفا اب تری دنیا والے

ہر وفادار کو نظروں سے گرا دیتے ہیں

ہر کوئی ناؤ ڈبو ہی نہیں دیتے طوفاں

یہ بھی ہوتا ہے کنارے بھی لگا دیتے ہیں

ان میں کیوں ذہن مرا رہتا ہے الجھا الجھا

یہ خیالات پریشاں مجھے کیا دیتے ہیں

گھونپنے دیجیے خنجر انہیں سینے میں مرے

یہ مرے دوست ہیں انعام وفا دیتے ہیں

جان تک بات کے بدلے میں گنواتے ہیں لوگ

آپ ہیں وعدہ کریں بھی تو بھلا دیتے ہیں

جا رہے ہیں مری جانب سے نگاہیں پھیرے

واہ کیا خوب محبت کا صلہ دیتے ہیں

کھیل ہے ان کا زمانے کی کہانی کیا ہے

خاک پر نقش بناتے ہیں مٹا دیتے ہیں

راز کی بات جو کہہ دیتے ہیں منزلؔ اکثر

کس لیے آپ وہ اوروں کو بتا دیتے ہیں