جلد از جلد بچھڑ جاؤں دعا دے مجھ کو

جلد از جلد بچھڑ جاؤں دعا دے مجھ کو

یہی بہتر ہے ترے حق میں بھلا دے مجھ کو

ہر کوئی صبر کی تلقین کیا کرتا ہے

کیسے کرتے ہیں کوئی یہ بھی بتا دے مجھ کو

میں ہوں صدیوں سے بھٹکتا ہوا پیاسا دریا

اے خدا کچھ تو سمندر کے سوا دے مجھ کو

مجھ سا دیوانہ نہیں سب کو میسر پیارے

اب تری مرضی ہے چاہے تو گنوا دے مجھ کو

اس سے پہلے کی خاموشی مجھے پاگل کر دے

اس سے کہیو کی ذرا آ کے رلا دے مجھ کو

ان دنوں دوست مرے سارے ہی روٹھے ہوئے ہیں

میرے دشمن یہی موقع ہے ہرا دے مجھ کو