جوانی زیست کا ہی ایک حصہ ہے

جوانی زیست کا ہی ایک حصہ ہے

پر اس نے میرا بچپن مجھ سے چھینا ہے

بجائے خودکشی کے دیکھ کر شیشہ

وہ جی بھر کے اگر رو لے تو اچھا ہے

پکڑ کر ایک انگلی ان کناروں کی

ندی نے دھیرے دھیرے چلنا سیکھا ہے

اترتے ہی زمیں پہ رات نے دیکھا

تھکا ہارا سا دن مٹی پہ لیٹا ہے

خود اپنے بچہ کو ہی گود میں لے کے

مجھے اک اچھا بیٹا بننا آیا ہے

مری آنکھیں مجھے سمجھیں نہ سمجھیں پر

مرے آنسو کا ہر قطرہ سمجھتا ہے

ذرا سی بات پر دل دکھتا ہے ابترؔ

یہ کوئی کہہ دے تو دل اور دکھتا ہے