جیت بخشے جو چراغوں کو ہوا زندہ باد

جیت بخشے جو چراغوں کو ہوا زندہ باد

اس پہ قربان چراغوں کی ضیا زندہ باد

میں نے دشمن کو مہارت پہ کوئی داد نہ دی

میرے اندر سے کوئی بول پڑا زندہ باد

اس محبت کے پیمبر سے تقابل کیسا

دشت سو بار جسے کہتا رہا زندہ باد

گھر کا مالک تو مرے ضبط پہ طعنہ زن تھا

گھر کی دیوار نے پر مجھ سے کہا زندہ باد

جو ترے جسم کے اوراق پڑھا کرتی ہے

رشک خوشبو ہے وہ بے مثل قبا زندہ باد

بزم یاراں میں مرے فن پہ ہے انگلی اٹھی

پھر مری فکر پہ بہتان لگا زندہ باد

مر گیا بھوک سے پر بھیک کا لقمہ نہ لیا

مرنے والے ترے کردار و انا زندہ باد

فیصلہ میرا شعوری تو نہیں ہو سکتا

جس کو تھی مات ہوئی اس کو لکھا زندہ باد

کر لے منظور ثنا خوانی کاظمؔ کو حسین

تو بھی زندہ ہے تری کرب و بلا زندہ باد