jin ke main dil mein raha karta tha dhaDkan ki tarah

jin ke maiñ dil meñ rahā kartā thā dhaḌkan kī tarah

vo mirā naam bhī ab lete haiñ dushman kī tarah

kisī jaadū kisī Tone se na aa.ī bas meñ

merī taqdīr hai rūThe hue sājan kī tarah

tum hameñ bhuul ga.e jā ke na.ī duniyā meñ

ham sulagte rahe barsāt ke īñdhan kī tarah

kal vo hī log jinheñ maiñ ne kahā thā apnā

aaj baiThe haiñ mirī raah meñ rahzan kī tarah

apnī qismat meñ to bas ḳhāk-nashīñ honā hai

ham na māthe pe sajeñge kabhī chandan kī tarah

us kā hī dāman-e-ummīd bharā jā.egā

un ke darbār meñ jā.egā jo nirdhan kī tarah

naaz ham apnī javānī pe kareñ kyoñ 'gulshan'

chhoḌ kar ye bhī chalī jā.egī bachpan kī tarah

jin ke main dil mein raha karta tha dhaDkan ki tarah

wo mera nam bhi ab lete hain dushman ki tarah

kisi jadu kisi Tone se na aai bas mein

meri taqdir hai ruThe hue sajan ki tarah

tum hamein bhul gae ja ke nai duniya mein

hum sulagte rahe barsat ke indhan ki tarah

kal wo hi log jinhen main ne kaha tha apna

aaj baiThe hain meri rah mein rahzan ki tarah

apni qismat mein to bas KHak-nashin hona hai

hum na mathe pe sajenge kabhi chandan ki tarah

us ka hi daman-e-ummid bhara jaega

un ke darbar mein jaega jo nirdhan ki tarah

naz hum apni jawani pe karen kyon 'gulshan'

chhoD kar ye bhi chali jaegi bachpan ki tarah