جو جاتا ہے وہ پھر واپس نبھانے کو نہیں آتا

جو جاتا ہے وہ پھر واپس نبھانے کو نہیں آتا

کوئی ویرانیوں میں گھر بسانے کو نہیں آتا

تجھے گر چاہیئے عزت تو خود کردار بہتر کر

کسی کی شخصیت کوئی بنانے کو نہیں آتا

ہمارے اسپتالوں پر برستے بم ہیں پر کوئی

ہماری موت کا ماتم منانے کو نہیں آتا

کبھی بھوکا نہ سویا میں تھی جب تک ماں مری زندہ

جو اب روٹھوں تو کوئی بھی منانے کو نہیں آتا

خدا تو زندگی بھر رکھ سلامت میرے والد کو

سوا ان کے کوئی ہمت بڑھانے کو نہیں آتا

اگر حسامؔ اس نے دل نہ توڑا ہوتا تو پھر میں

کبھی بھی محفلوں میں درد گانے کو نہیں آتا