جو ستارہ ٹوٹ کر پامال ہے اب خاک میں

جو ستارہ ٹوٹ کر پامال ہے اب خاک میں

یہ کبھی تابندہ تھا جب رہتا تھا افلاک میں

میں تو مٹی ہی تھی اور مٹی ہی رہ جاتی مگر

کوزہ گر کے ہاتھ میں یا تھا فسوں کچھ چاک میں

واقعہ تیری شرارت کا کوئی یاد آ گیا

ہنس پڑی بے ساختہ میں لمحۂ نمناک میں

کاٹ دو میرے پروں کو روک دو میری اڑان

بکھرے ہیں خوابوں کے ٹکڑے اس خس و خاشاک میں

شب نے رنگت کے لیے ہی ماہ و اختر کو اناؔ

دیکھیے ٹانکا ہے کیسے اپنی اس پوشاک میں