کبھی کبھی تو ملا کر کبھی کبھی ہی سہی

کبھی کبھی تو ملا کر کبھی کبھی ہی سہی

مری صدائیں سنا کر کبھی کبھی ہی سہی

تو اپنی شوخ ادا کے تمام رنگ لئے

مری غزل میں ڈھلا کر کبھی کبھی ہی سہی

تو چاند تاروں کا راہی میں خاک دھرتی کی

مجھے زمیں پہ ملا کر کبھی کبھی ہی سہی

مری اداسی مری خامشی سمجھنے کا

کوئی جتن تو کیا کر کبھی کبھی ہی سہی

کبھی زمانہ کی باتیں کبھی فلاں کا ذکر

کبھی مری بھی سنا کر کبھی کبھی ہی سہی

یہ بارشیں یہ ہوائیں تجھے بلاتی ہیں

کبھی تو کھل کے جیا کر کبھی کبھی ہی سہی