کبھی رکا میں یہاں تو کبھی وہاں ٹھہرا

کبھی رکا میں یہاں تو کبھی وہاں ٹھہرا

خوشی کے واسطے آخر کہاں کہاں ٹھہرا

وہ بھیک مانگ رہا تھا خلوص کی لیکن

صدائیں سن کے کسی کی کوئی کہاں ٹھہرا

جلے بہن یا کوئی اور کون پوچھے گا

مرا سماج تو ویسے بھی بے زباں ٹھہرا

دیار غیر میں جا کر تو کچھ سنور جاتا

ملے گا پیار یہی سوچ کر یہاں ٹھہرا

کسے خبر کہ وہ میری طرح سفر میں ہے

سکوت شب میں پرندہ کہاں کہاں ٹھہرا

نظر نواز نظارہ تھا دور سے لیکن

وقارؔ پاس سے دیکھا تو وہ دھواں ٹھہرا