کہیں جل کے تاب نگاہ سے مجھے دیکھنے کی سزا نہ دے

کہیں جل کے تاب نگاہ سے مجھے دیکھنے کی سزا نہ دے

جسے لوگ کہتے ہیں روشنی مری تیرگی کو بجھا نہ دے

یہ گمان صبح بقا کہیں نہ یقین شام فنا بنے

کہ اذان خواب سحر مجھے شب زندگی میں سلا نہ دے

یہی ایک لمحۂ جاں گسل تو نوید راحت درد ہے

دل بے خبر یہ متاع جاں کہیں آنسوؤں میں لٹا نہ دے

مرے حادثات حیات میں تری کائنات کی خیر ہو

کہ یہ ارتعاش نظر مرا ترے آسماں کو گرا نہ دے

یہ خیال مہر نشاط نو کہ یہ تیز تر تری روشنی

کسی چشم نم سے ہو منعکس تو دھنک کو تیری جلا نہ دے