karam ho kar ata ho kar baras jud-o-saKHa ho kar

karam ho kar 'atā ho kar baras jūd-o-saḳhā ho kar

kabhī sairāb kar de tan-badan kaalī ghaTā ho kar

bichhaḌnā thā muqaddar vo magar bichhḌā ḳhafā ho kar

thā jis kā Dar rahā āḳhir vahī ik sāniha ho kar

savālī ho agar to 'ājizī se sar jhukā rakkho

nahīñ jachte ye tevar ye anā hargiz gadā ho kar

kareñ tadbīr mā-hāsil magar mā'lūm hai is kā

haiñ sunte aa.e rahtā hai muqaddar kā likhā ho kar

ḳhudā.ī kā ye lahja dūriyāñ dekho baḌhā degā

samajh lenā ḳhasāra hī uThāoge ḳhudā ho kar

milan meñ aur judā.ī meñ alag haiñ rang jazboñ ke

sadā-e-dard ho rahnā kabhī rahnā ġhinā ho kar

miTā dene se ḳhud ko manzileñ miltī haiñ ulfat meñ

na kho denā kisī din tum mujhe sarf-e-anā ho kar

kisī kī aas hai yūñhī nahīñ ye lau lagī is ko

papīhā dil kā rahtā hai jo yuuñ naġhma-sarā ho kar

balā hai 'ishq logoñ ne bahut samjhāyā thā lekin

na pūchho lazzateñ pā.īñ jo is meñ mubtalā ho kar

hai kyā alfāz kī jādūgarī goyā samā'at meñ

khilāte haiñ ka.ī gul un laboñ se jo adā ho kar

nahīñ thā sahl miTTī kā safar kundan talak 'nasrīñ'

'atā-e-'ishq hai āḳhir rahe ham kīmiyā ho kar

karam ho kar 'ata ho kar baras jud-o-saKHa ho kar

kabhi sairab kar de tan-badan kali ghaTa ho kar

bichhaDna tha muqaddar wo magar bichhDa KHafa ho kar

tha jis ka Dar raha aaKHir wahi ek saniha ho kar

sawali ho agar to 'ajizi se sar jhuka rakkho

nahin jachte ye tewar ye ana hargiz gada ho kar

karen tadbir ma-hasil magar ma'lum hai is ka

hain sunte aae rahta hai muqaddar ka likha ho kar

KHudai ka ye lahja duriyan dekho baDha dega

samajh lena KHasara hi uThaoge KHuda ho kar

milan mein aur judai mein alag hain rang jazbon ke

sada-e-dard ho rahna kabhi rahna ghina ho kar

miTa dene se KHud ko manzilen milti hain ulfat mein

na kho dena kisi din tum mujhe sarf-e-ana ho kar

kisi ki aas hai yunhi nahin ye lau lagi is ko

papiha dil ka rahta hai jo yun naghma-sara ho kar

bala hai 'ishq logon ne bahut samjhaya tha lekin

na puchho lazzaten pain jo is mein mubtala ho kar

hai kya alfaz ki jadugari goya sama'at mein

khilate hain kai gul un labon se jo ada ho kar

nahin tha sahl miTTi ka safar kundan talak 'nasrin'

'ata-e-'ishq hai aaKHir rahe hum kimiya ho kar