کشش زمین کی جائے گی رائیگاں کب تک

کشش زمین کی جائے گی رائیگاں کب تک

نہیں گرے گا بلندی سے آسماں کب تک

سوال یہ ہے کہ یہ تشنہ کام دوڑیں گے

تلاش آب میں ٹیلوں کے درمیاں کب تک

خیال نے کبھی عریاں نہیں کیا ہے تجھے

گریز اور کرے گا مرا گماں کب تک

اس ایک خوف نے مرنے نہیں دیا ہے مجھے

کہ رفتگاں میں رہے گا مرا نشاں کب تک

ملا تو مجھ سے کیے اس نے بے شمار سوال

ہر ایک بات میں کیوں کس لیے کہاں کب تک

جو لفظ لفظ مجھے نوچتی ہے اندر سے

سنائی جائے گی عاصمؔ وہ داستاں کب تک