خاک وحشت سر پر ڈالوں میں پاگل ہو جاؤں

خاک وحشت سر پر ڈالوں میں پاگل ہو جاؤں

یا پھر ظرف کا ساگر چھوڑوں اور بادل ہو جاؤں

میری قسمت کی تاریکی کچھ تو رنگ دکھائے

اس کی آنکھوں میں جا بیٹھوں میں کاجل ہو جاؤں

ہجر کی تپتی دھوپ نے مجھ کو اک صحرا کر ڈالا

قرب کا بادل آئے برسے میں جل تھل ہو جاؤں

زہر جو لے کے آئے کوئی اس کو پاس بٹھاؤں

اپنے من کی خوشبو بانٹوں میں صندل ہو جاؤں

مالی میری شاخیں میرے پتے کاٹ رہا ہے

باغیچے کی حد سے نکلوں پھر جنگل ہو جاؤں

لوٹوں سیدؔ اس نگری کو جس کا ہوں باشندہ

آج سے رشتہ ناتا توڑوں پھر سے کل ہو جاؤں