خود کو خدا سمجھتا ہے نادان یاد رکھ

خود کو خدا سمجھتا ہے نادان یاد رکھ

اب تک نہیں ہوا ہے تو انسان یاد رکھ

سینکی ہیں تو نے روٹیاں اوروں کی آنچ پر

کھائے ہیں تو نے اوروں کے پکوان یاد رکھ

تجھ پر الٹ رہے ہیں ترے پینترے سبھی

خود کا ہی کر رہا ہے تو نقصان یاد رکھ

تو نے لیا ہے جو وہ چکانا بھی ہے تجھے

اے قرض دار سب کا تو احسان یاد رکھ

عورت ہے گر سیا تو ہے کالی کا روپ بھی

یہ کھیل کا نہیں کوئی سامان یاد رکھ

تیرے بھلے کی بات کہی ہے برا نہ مان

دے گا جو وہ ملے گا مری جان یاد رکھ