خدا جانے کہاں یہ فکر کا رہوار لے جائے

خدا جانے کہاں یہ فکر کا رہوار لے جائے

سمندر میں ڈوبا دے یا سمندر پار لے جائے

لگانا ہو جسے اپنے سفینے کو کنارے سے

میں دے دوں گا مگر وہ مانگ کر پتوار لے جائے

میں یوسف تو نہیں لیکن زلیخائے جہاں سن لیں

نہ ہو جس کو یقیں مجھ کو سر بازار لے جائے

بھکاری بن کے آتا ہوں کبھی یہ آپ نے سوچا

کہاں تک آپ کے در سے کوئی انکار لے جائے

وہ میری نفرتوں سے ختم کر کے واسطہ اپنا

کوئی دشمن بھی ہو میرا تو مجھ سے پیار لے جائے

یہ باتیں ہیں الگ سانسیں مری تھمنے کو ہیں لیکن

میں جب تک ہوں دوا صحت کی ہر بیمار لے جائے

یقیں ہے جیت لے گا دل وہ سارے سننے والوں کا

اگر محفل میں غیبیؔ کو کوئی اک بار لے جائے