kuchh nahin ashk-e-nadamat ke siwa sail ke pas

kuchh nahīñ ashk-e-nadāmat ke sivā saa.il ke paas

sharm aatī hai mujhe jaate hue qātil ke paas

ai mirī nādārī-e-dil ye batā de tū mujhe

nazr karne ke liye le jā.ūñ kyā qātil ke paas

kar diyā majbūr aisā shauq ne armān ne

vaa.e nākāmī-e-dil jaanā paḌā qātil ke paas

thī zarūrat zaḳhm-e-dil kī ho gayā hāsil mujhe

aur phir rakkhā hī kyā hai mā-sivā qātil ke paas

apne dil kī kyā batā.eñ kuchh nahīñ ham ko ḳhabar

hosh hī kho baiThe apne pohñch kar manzil ke paas

imtihān-e-dil se pahle be-ḳhudī ne kho diyā

duur thā manzil se ya.anī pohñch kar manzil ke paas

kaaT leñge ḳhud-baḳhud apnā galā ham shauq meñ

kyā ġharaz hai ham ko kyoñ jaate phireñ qātil ke paas

rāz-e-vahshat pūchhte ho kyā hamārā 'rāz' tum

bārhā lauT aa.e haiñ jā jā ke ham qātil ke paas

kuchh nahin ashk-e-nadamat ke siwa sail ke pas

sharm aati hai mujhe jate hue qatil ke pas

ai meri nadari-e-dil ye bata de tu mujhe

nazr karne ke liye le jaun kya qatil ke pas

kar diya majbur aisa shauq ne arman ne

wae nakaami-e-dil jaana paDa qatil ke pas

thi zarurat zaKHm-e-dil ki ho gaya hasil mujhe

aur phir rakkha hi kya hai ma-siwa qatil ke pas

apne dil ki kya bataen kuchh nahin hum ko KHabar

hosh hi kho baiThe apne pohnch kar manzil ke pas

imtihan-e-dil se pahle be-KHudi ne kho diya

dur tha manzil se yani pohnch kar manzil ke pas

kaT lenge KHud-baKHud apna gala hum shauq mein

kya gharaz hai hum ko kyon jate phiren qatil ke pas

raaz-e-wahshat puchhte ho kya hamara 'raaz' tum

barha lauT aae hain ja ja ke hum qatil ke pas