کچھ پوشیدہ زخم عیاں ہو سکتے تھے

کچھ پوشیدہ زخم عیاں ہو سکتے تھے

اس سے مل کر درد رواں ہو سکتے تھے

ان آنکھوں کو دیر تلک دیکھا ہوتا

ان آنکھوں میں خواب نہاں ہو سکتے تھے

تم نے ایک ستارہ کو دنیا سمجھا

اس کے آگے اور جہاں ہو سکتے تھے

تم تو پہلے دروازے سے لوٹ آئے

بستی میں کچھ اور مکاں ہو سکتے تھے

رفتہ رفتہ آ پہنچے ویرانے تک

ہم دیوانے اور کہاں ہو سکتے تھے

ہر صورت بنتی تھی اور بگڑتی تھی

اس عالم میں صرف گماں ہو سکتے تھے

آگ ہوا اور پانی ہی سرمایا تھا

حد سے حد ہم لوگ دھواں ہو سکتے تھے