کچھ تو ہمارا عکس بھی مبہم ہے دوستو

کچھ تو ہمارا عکس بھی مبہم ہے دوستو

کچھ ہم پہ روشنی بھی ذرا کم ہے دوستو

لگتا ہے کوئی شام غریباں تھی کن‌ فکاں

یہ ساری کائنات شب غم ہے دوستو

ماضی نہ حال کچھ بھی نہیں ہے ابد تلک

یہ وقت ایک لمحۂ پیہم ہے دوستو

اس زخم دل کو روز نیا زخم دیجے

یہ زخم جس کو زخم ہی مرہم ہے دوستو

سارے جہاں میں کوئی نظارہ نہیں جسے

یہ کہہ سکیں کہ آنکھ کا محرم ہے دوستو

جس سے گزر کے کچھ نہیں کھلتا کہاں ہیں ہم

اس راستے میں ایک عجب خم ہے دوستو

دل میں کبھی جو شہر بسایا تھا عشق نے

وہ شہر آج درہم و برہم ہے دوستو