کیا اشک کی زبان میں غم بولتے نہیں

کیا اشک کی زبان میں غم بولتے نہیں

اس بات پر نہ جاؤ کہ ہم بولتے نہیں

تم تو سوال شوق پہ تصویر بن گئے

دنیا نے سچ کہا ہے صنم بولتے نہیں

دل توڑنا گناہ ہے چاہے وہ کفر ہو

اس مسئلے پہ اہل حرم بولتے نہیں

آواز دے رہی ہیں ہمیں تازہ الجھنیں

ہر چند ان کی زلف کے خم بولتے نہیں

وہ ہو گئے ہیں مہر بہ لب بعد التفات

احسان کر کے اہل کرم بولتے نہیں

نظریں تو چھیڑتی ہیں فسانے نئے نئے

تم بولتے نہیں کبھی ہم بولتے نہیں

مغرور ہو اگر کوئی اس شان کا تو ہو

سجدوں سے ان کے نقش قدم بولتے نہیں