کیا بات ہے کیوں زلف پریشان نہیں ہے

کیا بات ہے کیوں زلف پریشان نہیں ہے

اس بحث کا اب فیصلہ آسان نہیں ہے

پردے میں لگاوٹ بھی ہے شوخی بھی حیا بھی

سب کچھ ہے مگر جنس کا طوفان نہیں ہے

انسان کے اوصاف حمیدہ کو نہ مانے

اک مرد مسلمان کی یہ شان نہیں ہے

پھر پیار کی تحریک ہے طوفان کی زد میں

لیکن مرا بازو ابھی بے جان نہیں ہے

واقف نہ ہو ایمان میں تسلیم و رضا سے

ایسا بھی نئے دور کا انسان نہیں ہے

جس شوق سے میں نے تمہیں تسلیم کیا ہے

انصاف تو کہہ سکتے ہو احسان نہیں ہے