کیا خبر تھی رنجشوں کا سلسلہ ہو جائے گا

کیا خبر تھی رنجشوں کا سلسلہ ہو جائے گا

اک ذرا سی بات ہوگی وہ خفا ہو جائے گا

یہ تو سوچا ہی نہ تھا یخ بستہ لمحوں کا سکوت

ایک دن ٹوٹے گا اور سنگ صدا ہو جائے گا

موج دریا خامشی کو میری فطرت مت سمجھ

تشنہ لب کھولوں تو اب کے فیصلہ ہو جائے گا

بت تراشا تھا انہی ہاتھوں سے میں نے ایک دن

پر کسے معلوم تھا وہ بت خدا ہو جائے گا

ہم یہی سمجھے تھے اک دل ہی تو ہے اپنے لئے

ہم کہاں سمجھے تھے اتنا سرپھرا ہو جائے گا