لطف محفل اور نہ پینے کا مزہ رہ جائے گا

لطف محفل اور نہ پینے کا مزہ رہ جائے گا

تو نہ ہو ساقی تو میخانے میں کیا رہ جائے گا

آپ اگر یوں ہی نظر کے جام چھلکاتے رہے

میں تو کیا پھر کون ہے جو پارسا رہ جائے گا

جانے والے چھوڑتا جا اپنی یادوں کے نقوش

ورنہ جینے کے لئے کیا مشغلہ رہ جائے گا

یہ نہ تھا معلوم دنیا ہی مری لٹ جائے گی

جب کہ منزل سے ذرا سا فاصلہ رہ جائے گا

اتفاقاً جب کبھی وہ روبرو آ جائیں گے

کیا خبر تھی دل کا دل میں مدعا رہ جائے گا

یہ بھی تو سوچو تماشا دیکھنے والو ذرا

ہم جو ڈوبیں گے تو کیا ساحل بچا رہ جائے گا

دور ہو جائے خلش ایسا کبھی ممکن نہیں

زخم سینے کا اگر کوئی ہرا رہ جائے گا

ایک دن ایسا بھی آئے گا نہ سوچا تھا کبھی

لمحہ لمحہ زیست کا بن کر سزا رہ جائے گا

خاطر احباب یہ ہستی فنا کر دے نصیرؔ

تو نہ ہوگا نام تو باقی ترا رہ جائے گا