محروم زندگی ہے سوالی کبھی کبھی

محروم زندگی ہے سوالی کبھی کبھی

جیسے کسی فقیر کی تھالی کبھی کبھی

اکثر تصورات میں اڑتا رہا ہوں میں

کام آ گئی یہ خام خیالی کبھی کبھی

ایجاد نو تو وقت کا ذوق جمیل ہے

باسی کڑھی بھی اس نے ابالی کبھی کبھی

نفرت کی آگ پھیل رہی ہے ادھر ادھر

ہوتی ہے میرے گھر میں دیوالی کبھی کبھی

یہ زندگی کی قبر بہت تنگ ہے مگر

جینے کی راہ اور نکالی کبھی کبھی

جیسے شریف لوگ بھی سرکس کے ہو گئے

ماحول نے لگائی ہے تالی کبھی کبھی

سیفیؔ نئے مزاج کا یہ شہر تو نہیں

جدت یہاں بھی آئی نرالی کبھی کبھی