mahshar mein chalte chalte karunga ada namaz

mahshar meñ chalte chalte karūñgā adā namāz

paḌh luñgā pul-sirāt pe 'mā.il' qazā namāz

sar jaa.e umr bhar kī ho yārab adā namāz

aa.e mirī qazā to paḌhūñ maiñ qazā namāz

māñgī najāt hijr se to maut aa ga.ī

roze gale paḌe jo chhuḌāne gayā namāz

dekho ki phañs na jaa.eñ farishte bhī jaal meñ

kyuuñ paḌh rahe ho khol ke zulf-e-rasā namāz

har ik sutūn ḳhāna-e-shar-e-sharīf hai

roza ho yā zakāt ho yā haj ho yā namāz

ye kyuuñ ḳhamīda hai sifat-e-sāhab-e-rukū

kyā paḌh rahī hai dosh pe zulf-e-dotā namāz

niyyat jo bāñdh lī to chalā maiñ huzūr meñ

rahbar mirī namāz mirī rahnumā namāz

saaqī qayām se ye jo aayā rukūa meñ

shīsha ḳhudā ke ḳhauf se paḌhtā hai kyā namāz

uTh uTh ke baiTh baiTh ke kartā hai kyuuñ ġhurūr

zāhid kahīñ baḌhā.e na terī riyā namāz

arkān yaad haiñ mujhe ai dāvar-e-jazā

gar hukm ho to sāmne paḌh luuñ qazā namāz

shaitān ban gayā hai farishta ġhurūr se

kyā fā.eda huā jo paḌhī jā-ba-jā namāz

le jaate haiñ mujhe sū-e-dozaḳh kashāñ kashāñ

roze mire idhar haiñ udhar hai qazā namāz

haqq-ul-yaqīñ kā naam urūj-e-maqām hai

paḌhte haiñ auliyā sar-e-dosh-e-havā namāz

masjid meñ pāñch vaqt duā vo bhī vasl kī

'mā.il' butoñ ke vāste paḌhte ho kyā namāz

mahshar mein chalte chalte karunga ada namaz

paDh lunga pul-siraat pe 'mail' qaza namaz

sar jae umr bhar ki ho yarab ada namaz

aae meri qaza to paDhun main qaza namaz

mangi najat hijr se to maut aa gai

roze gale paDe jo chhuDane gaya namaz

dekho ki phans na jaen farishte bhi jal mein

kyun paDh rahe ho khol ke zulf-e-rasa namaz

har ek sutun KHana-e-shar-e-sharif hai

roza ho ya zakat ho ya haj ho ya namaz

ye kyun KHamida hai sifat-e-sahab-e-ruku

kya paDh rahi hai dosh pe zulf-e-dota namaz

niyyat jo bandh li to chala main huzur mein

rahbar meri namaz meri rahnuma namaz

saqi qayam se ye jo aaya rukua mein

shisha KHuda ke KHauf se paDhta hai kya namaz

uTh uTh ke baiTh baiTh ke karta hai kyun ghurur

zahid kahin baDhae na teri riya namaz

arkan yaad hain mujhe ai dawar-e-jaza

gar hukm ho to samne paDh lun qaza namaz

shaitan ban gaya hai farishta ghurur se

kya faeda hua jo paDhi ja-ba-ja namaz

le jate hain mujhe su-e-dozaKH kashan kashan

roze mere idhar hain udhar hai qaza namaz

haqq-ul-yaqin ka nam uruj-e-maqam hai

paDhte hain auliya sar-e-dosh-e-hawa namaz

masjid mein panch waqt dua wo bhi wasl ki

'mail' buton ke waste paDhte ho kya namaz