میں یہ نہیں کہتا کہ گنہ گار نہیں ہوں

میں یہ نہیں کہتا کہ گنہ گار نہیں ہوں

عائد ہو کوئی جرم وہ کردار نہیں ہوں

جس سے مری پہچان ہی مٹ جائے جہاں سے

میں ایسی نوازش کا طلب گار نہیں ہوں

یا میری وفاؤں کا بدل ڈھونڈ کے لاؤ

یا مجھ سے یہ کہہ دو کہ وفادار نہیں ہوں

معراج محبت مجھے حاصل ہو تو کیسے

دل ہے مرا مختار میں مختار نہیں ہوں

آزاد پرندے کی طرح سوچ ہے اب بھی

ہو کر بھی گرفتار گرفتار نہیں ہوں

یہ کون سی منزل سے خدا جانے جنوں کی

ہوتے ہوئے بیزار بھی بیزار نہیں ہوں

آغاز محبت تو بہت خوب ہے تابشؔ

انجام محبت سے خبردار نہیں ہوں