متاع زیست کا محور نہ قید ہو جائے

متاع زیست کا محور نہ قید ہو جائے

ہتھیلیوں میں مقدر نہ قید ہو جائے

میں اب کی بار بہت کھل کے رو نہیں پایا

یہ سانحہ مرے اندر نہ قید ہو جائے

قفس سے نکلے پرندے کی لے تو لوں تصویر

مگر رہائی کا منظر نہ قید ہو جائے

ابھی تو خشک زمینوں پہ لوگ قابض ہیں

پھر اس کے بعد سمندر نہ قید ہو جائے

وہی دھواں جو اگلتے ہیں گھر کے سب افراد

اسی دھوئیں میں مرا گھر نہ قید ہو جائے

برش اٹھائے ہوئے سوچ میں ہوں گم اظہرؔ

ترے خیال کا پیکر نہ قید ہو جائے