موجودگی میں بھی اسے پایا نہیں گیا

موجودگی میں بھی اسے پایا نہیں گیا

یعنی اسے وجود میں لایا نہیں گیا

بکھرا پڑا تھا فرش نگہ پر تمام رات

لیکن وہ خواب مجھ سے اٹھایا نہیں گیا

میں اس کی دھوپ سے تو کبھی کا نکل چکا

دل سے مگر اس عکس کا سایہ نہیں گیا

کیسے میں اپنے آپ کو پہچانتا بتاؤ

آنکھوں سے میری مجھ کو دکھایا نہیں گیا

کچھ اس لئے بھی ٹھوکریں کھانی پڑیں مجھے

میں اپنے راستے سے اٹھایا نہیں گیا

اس کے ہی انتظار میں یہ لوگ ہیں نڈھال

جس شخص سے یہاں کبھی آیا نہیں گیا