میرے نغمات میں ہے اشکوں کی آہٹ جیسے

میرے نغمات میں ہے اشکوں کی آہٹ جیسے

سبزہ و گل میں ہو شبنم کی تراوٹ جیسے

بے خیالی میں کٹے جاتے ہیں دن رات اپنے

عالم خواب میں بدلے کوئی کروٹ جیسے

ذہن گوتم کا سہی پھر بھی مرا دل اب بھی

ایک بالک ہے کوئی کرشن سا نٹکھٹ جیسے

کچھ بچا کر نہ رکھی اپنے لیے عمر عزیز

اب مرے جام میں ہے تھوڑی سی تلچھٹ جیسے

یہ شب ماہ یہ کوہسار یہ وادی یہ گھٹا

اس کے پیکر کی پراسرار بناوٹ جیسے

یوں مرے دل میں ہے اے زیبؔ تمناؤں کی بھیڑ

کسی تربت پہ حسینوں کا ہو جمگھٹ جیسے