مرے وجود کو تقسیم کرنے والا تھا

مرے وجود کو تقسیم کرنے والا تھا

جو آئنہ تھا مقابل بکھرنے والا تھا

شراب ساقیا کیوں دے رہا ہے بوتل میں

کہاں گیا جو یہاں جام بھرنے والا تھا

ہمیں خبر ہی نہ تھی آسمان کا زینہ

زمیں کی آخری حد تک اترنے والا تھا

یہ کیا کیا کہ مرا آئنہ ہی توڑ دیا

میں اپنے عکس کی پہچان کرنے والا تھا

وہ زلزلے میں بھلا کیا سنبھالتا خود کو

جو اپنے جسم کی جنبش سے ڈرنے والا تھا

اسے تو موت نے مجبور کر دیا عاصمؔ

کہاں وہ اتنی دلیری سے مرنے والا تھا