مٹی مٹی ہو کر بھی وہ آنکھوں میں بھر آتے ہیں

مٹی مٹی ہو کر بھی وہ آنکھوں میں بھر آتے ہیں

کوہ ندا کو جانے والے لوگ پلٹ کر آتے ہیں

ان میں سرایت کر جاتا ہے یوں میرا پتھریلا پن

اب رخساروں کے بدلے ہاتھوں میں پتھر آتے ہیں

کیا میری تنہائی نے ہر دوست کو تنہا کر ڈالا

وہ جو کبھی ملتے ہی نہ تھے وہ ملنے اکثر آتے ہیں

ان میہمانوں کی خاطر دہلیز پہ بیٹھا رہتا ہوں

میرے گھر میں رزق آتا ہے اور کبوتر آتے ہیں

اور ہی دنیا کی خوشبو آتی ہے میرے زخموں سے

شام ترے نوکیلے پنجے کس کو چھو کر آتے ہیں

ناطہ توڑنے والو تم سے جنگ نہیں کرنے کے ہم

تم بیٹھو ہم شعب ابی طالب سے ہو کر آتے ہیں