محبت ہم نے کی ہے ہم تمہیں دل سے دعا دیں گے

محبت ہم نے کی ہے ہم تمہیں دل سے دعا دیں گے

مگر ان چاہتوں کی آپ جانے کیا سزا دیں گے

گلے شکوہ ہمارے درمیاں جو ہیں مٹا دیں گے

ملیں گے جب بھی ہم اک دوسرے سے مسکرا دیں گے

ہمارے چہرے کی مایوسیوں کو ہم سے مت پوچھو

کسی دن آپ کے ہاتھوں میں ہم بھی آئنہ دیں گے

کوئی آواز اونچی کر کے بولے کب گوارہ ہے

اگرچہ نرم لہجہ ہو تو ہم بھی دل بچھا دیں گے

ہمارے صبر کا تم امتحاں مت لو تو بہتر ہے

زباں کھولی اگر ہم نے تو ہنگامہ اٹھا دیں گے

مریض عشق ہوں میں تھوڑا مشکل ہے مرض میرا

اگر دینا پڑے گی آپ مجھ کو کیا دوا دیں گے

دلوں کی بات کو دل میں رکھو گے تو ہی بہتر ہے

زباں پر آ گئی تو لوگ ناحق ہی ہوا دیں گے

محبت کے ہرے پودے لگاؤ انجناؔ اب تم

جو ان کی چھانو میں بیٹھیں گے وہ سارے دعا دیں گے