مدت پہ ملی ٹوٹ کے برسات ہماری

مدت پہ ملی ٹوٹ کے برسات ہماری

پھر عشق مصلے پہ کٹی رات ہماری

اس بار بھی نافہ میں ذرا مشک نہ نکلا

اس بار بھی بے کار گئی گھات ہماری

ہم مسجد و منبر کی ضرورت سے سوا تھے

دیکھی نہیں دنیا نے کرامات ہماری

اس رات تو ہم جسم کے حجرے سے نہ نکلے

اس رات ہوئی اتنی مدارات ہماری

اس بار ہے محور ہی کوئی اور زمیں کا

سردی ہے نہ گرمی ہے نہ برسات ہماری

حامی نہ بھری عشق کے منشور پہ اس نے

بے کار گئی یہ بھی ملاقات ہماری

اللہ کے بندوں کا وہی خوف ہے دل میں

اس بار بھی سجدے میں کٹی رات ہماری