مجھ کو تو یہ فریب تمنا دکھائی دے

مجھ کو تو یہ فریب تمنا دکھائی دے

دنیا ترے بغیر تماشہ دکھائی دے

کس کو بتائیں جا کے زمانے میں اپنا غم

ہر شخص اپنی آگ میں جلتا دکھائی دے

کل تک جو کہہ رہا تھا اندھیروں کا غم نہ کر

اب وہ بھی روشنی کا لٹیرا دکھائی دے

انسان اپنی زیست کے رنگین خواب سے

روتا دکھائی دے کبھی ہنستا دکھائی دے

سولی چڑھائیے اسے منصور کی طرح

جس کے لبوں پہ سچ کا اجالا دکھائی دے

ہر دم مہک رہا ہے یہ تیرے خیال سے

دل بھی ترے مکاں کا دریچہ دکھائی دے

دشمن کے پاس مجھ کو ذرا لے چلو عدیمؔ

کچھ تو مری حیات کو رستہ دکھائی دے