مجھ پہ دہلیز سے پھینکا ہے گل تر کس نے

مجھ پہ دہلیز سے پھینکا ہے گل تر کس نے

میرے اللہ جگایا ہے مقدر کس نے

میری جانب تھا رفیقوں کی رفاقت کا حصار

پھر مری پشت پہ گھونپا ہے یہ خنجر کس نے

حسن اخلاق کے پیکر تھے ہمارے بچے

ان کے ہاتھوں میں تھمایا ہے یہ پتھر کس نے

کتنا پر کیف ہے گرداب کا منظر دیکھو

دل کے تالاب میں پھینکا ہے یہ کنکر کس نے

گل بدن زہرہ جبیں تو ہی بتا دے مجھ کو

اس محبت سے تراشا ہے یہ پیکر کس نے

غائبانہ ہوئی ہوگی کوئی نصرت صارمؔ

ورنہ تم کو یوں بنایا ہے سخن ور کس نے