مسافرت میں سکوں کے سفر نہیں آئے

مسافرت میں سکوں کے سفر نہیں آئے

ہمارے ہاتھ میں چاہت کے پر نہیں آئے

ہزار منظر خوش رنگ ہیں نگاہوں میں

ترے سوا مجھے کچھ بھی نظر نہیں آئے

مثال شہر خموشاں ہے تیری بستی بھی

ادھر گئے جو کبھی پھر ادھر نہیں آئے

تجھے پتہ تو چلے انتظار کی زحمت

تو راہ دیکھتا ہو وہ مگر نہیں آئے

یہ جانتے ہوئے راہوں کے ہو گئے پتھر

کہ جانے والے کبھی لوٹ کر نہیں آئے

نکل گئے جو ترے دل سے در بدر ٹھہرے

خضرؔ کبھی بھی انہیں راس گھر نہیں آئے